ដោយ មឿង ទុម 2009-11-07
កាលពីថ្ងៃសុក្រ ទី៦ ខែវិច្ឆិកា រដ្ឋាភិបាលថៃបានព្រមានថា ថៃអាចនឹងបិទច្រកព្រំដែនរបស់ថៃទាំងអស់ដែលនៅជាប់នឹងប្រទេស កម្ពុជា។
ឧបនាយករដ្ឋមន្ត្រីថៃ លោក ស៊ុធិប ថូសុបាន ថ្លែងដូច្នេះ ត្រូវបានទីភ្នាក់ងារព័ត៌មាន អាអេហ្វប៉េ (AFP) ផ្សាយបន្តទៀតថា ប្រសិនបើកម្ពុជានៅតែប្រកាន់ជំហរតឹងរ៉ឹងនៅតែមិនព្រមសម្រុះសម្រួល គឺពេលនោះហើយដែលភាគីថៃគួរតែកាត់បន្ថយទំនាក់ទំនង ហើយអាចនឹងបិទច្រកព្រំដែនទាំងអស់ផង។ ប៉ុន្តែទោះថ្លែងដូច្នេះក្តីក៏លោកឧបនាយករដ្ឋមន្ត្រីថៃរូបនេះបាន បញ្ជាក់ថា មកដល់ពេលនេះគ្មានសេចក្តីរាយការណ៍ណាមួយដែលរាយការណ៍មកថា នៅតាមព្រំដែនមានបញ្ហាអ្វីកើតឡើងឡើយ ចំណែកដំណើរការពាណិជ្ជកម្មក៏នៅតែមានសភាពជាធម្មតា។
នៅប្រទេសថៃឯណោះវិញ គឺអាជ្ញាធរថៃបានបង្កើនការរឹតបណ្តឹងកិច្ចការពារសន្តិសុខជុំវិញ ស្ថានទូតខ្មែរដែលឋិតនៅក្នុងទីក្រុងបាងកក។ ការបង្កើនកិច្ចការពារនោះគឺធ្វើឡើងតាំងពីព្រឹកថ្ងៃសុក្រ នៅបន្ទាប់ពីឯកអគ្គរាជទូតខ្មែរត្រូវបានកោះហៅឲ្យវិលចូលកម្ពុជា វិញដែរនោះ។
លោកឧបនាយករដ្ឋមន្ត្រីថៃ ស៊ុធិប ថ្លែងបញ្ជាក់ថា មកដល់ពេលនេះនៅពុំទាន់មានគម្រោងដែលនឹងឲ្យនាយករដ្ឋមន្រ្តីថៃ បច្ចុប្បន្ន គឺលោក អាភីស៊ិត វេឆាឈីវ៉ាក់ (Abhisit Vejjajiva) ជួបលោក ហ៊ុន សែន នាយករដ្ឋមន្រ្តីនៃប្រទេសកម្ពុជានៅឡើយទេ បើទោះបីប្រមុខរាជរដ្ឋាភិបាលនៃប្រទេសទាំងពីរត្រូវទៅចូលរួមក្នុង សន្និសីតស្តីពីប្រទេសដែលនៅជាប់អាងទន្លេមេគង្គ ដែលនឹងផ្តើមប្រជុំនៅថ្ងៃសុក្រ ទី៦ ខែវិច្ឆិកា ឆ្នាំ២០០៩នេះ នៅក្នុងប្រទេសជប៉ុនក្តី។
សូមរំឭកជូនថា ទំនាក់ទំនងការទូតរវាងកម្ពុជានិងថៃត្រូវបានរង្គោះរង្គើខ្លាំង ក្នុងសប្តាហ៍នេះ ដោយសារតែភាគីថៃប្រឆាំងចំពោះការដែលរដ្ឋាភិបាលកម្ពុជាប្រកាសថា នឹងមិនធ្វើបត្យាប័ន លោក ថាក់ស៊ីន ឈីនណាវ៉ាត្រ អតីតនាយករដ្ឋមន្រ្តីថៃ តាមសំណើរដ្ឋាភិបាលថៃទេ បើទោះបីក្នុងករណីដែលលោក ថាក់ស៊ីន ធ្វើដំណើរឆ្លងកាត់ឬព្រមទៅរស់នៅក្នុងប្រទេសកម្ពុជា តាមការអញ្ជើញរបស់លោក ហ៊ុន សែន នាយករដ្ឋមន្រ្តីកម្ពុជាក្តី។ មិនតែប៉ុណ្ណោះរដ្ឋាភិបាលកម្ពុជាក៏បានបញ្ជាក់ជាថ្មីតែងតាំងលោក ថាក់ស៊ីន ឲ្យធ្វើជាទីប្រឹក្សាផ្ទាល់របស់លោក ហ៊ុន សែន នាយករដ្ឋមន្រ្តីខ្មែរ និងឲ្យធ្វើជាទីប្រឹក្សាផ្នែកសេដ្ឋកិច្ចរបស់រដ្ឋាភិបាលកម្ពុជាផង ដែលមានទាំងការឡាយព្រះហស្តលេខាយល់ព្រមពីព្រះមហាក្សត្រខ្មែរ ផងដែរ៕
No comments:
Post a Comment