ប្រជាកសិករខ្មែរជាច្រើនជាពិសេសអ្នកប្រកបមុខរបរធ្វើស្រែចម្ការដាំបន្លែនិងដំណាំផ្សេងៗសម្រាប់លក់ ឬបរិភោគ និយមប្រើថ្នាំគីមីពុលកសិកម្មពីទីផ្សារជាវិធីការពារដំណាំរបស់ខ្លួន។ កសិករជាច្រើន បានប្រើថ្នាំគីមីពុលកសិកម្មដោយមិនដឹងថាវាត្រូវនឹងសត្វល្អិត ឬជំងឺអ្វីនោះទេ ដោយចេះតែប្រើស្មានៗ ហើយនៅពេលប្រើប្រាស់ទៀតសោតហាក់ដូចមិនសូវបារម្ភ ខ្វាយខ្វល់អំពីសុខភាពផ្ទាល់ខ្លួនទេ។ការយល់ច្រឡំ និងកង្វះខាតការយល់ដឹងអំពីថ្នាំគីមីពុលកសិកម្ម និងបញ្ហារបស់វានេះ នាំមកផលវិបាកជាច្រើនដល់ប្រជាកសិករ អ្នកបរិភោគបរិស្ថាននិងសង្គមមនុស្សទាំងមូល។
បាទ មិត្តអ្នកស្តាប់ជាទីមេត្រី ដើម្បីជាជំនួយ និងបង្កើននូវការយល់ដឹងអំពីថ្នាំពុលគីមីកសិកម្មនិងបញ្ហារបស់វានេះនាទីអភិវឌ្ឍន៍ជនបទ និងបរិស្ថាន នៅថ្ងៃនេះនឹងជម្រាបអំពិឥទ្ធិពលថ្នាំគីមីពុលកសិកម្មទៅលើបរិស្ថានតាមរយៈការបកស្រាយពន្យល់របស់លោកបណ្ឌិតយ៉ងសាំងកុមារប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជានៅ ក្រុងភ្នំពេញ។
ដូចដែលយើងដឹងរួចមកហើយថា ថ្នាំគីមីពុលកសិកម្ម មិនគ្រាន់តែប៉ះពាល់ដល់រាង កាយនិងសុខភាពមនុស្សយើងប៉ុណ្ណោះទេ ប៉ុន្តែថែមទាំងប៉ះពាល់ទៅដល់បរិស្ថានទៀតផង។ លោក បណ្ឌិតយ៉ង សាំងកុមារ មានប្រសាសន៍ថាឥទ្ធិពលមិនល្អរបស់ថ្នាំគីមីពុលកសិកម្ម ទៅលើបរិស្ថានមានដូចជាការនាំមកនូវភាពកខ្វក់ទឹក ការសម្លាប់សត្វមានប្រយោជន៍ផ្សេងៗ បង្កឲ្យសត្វល្អិតចង្រៃមានភាពស៊ាំទៅនឹងថ្នាំគីមីពុល ព្រមទាំងការបន្សល់ទុកនូវកាកសំណល់ថ្នាំគីមីពុលក្នុងបរិស្ថានធម្មជាតិក្នុងរយៈយូរអង្វែង។
សំឡេងបណ្ឌិតយ៉ង សាំង កុមារ៖ លោកបណ្ឌិតយ៉ង សាំងកុមារ មានប្រសាសន៍ថា លើសពីនេះថ្នាំគីមីពុលកសិកម្មសម្លាប់ដល់សត្វមានប្រយោជន៍ទៀតផងដូចជា ឃ្មុំ ឪម៉ាល់ជាដើមដែលជាសត្វមានប្រយោជន៍សំខាន់ណាស់ក្នុងការពាំលម្អងផ្កាពីផ្កាឈ្មោលមកផ្កាញីដែលអាចធ្វើឲ្យមានផ្លែផ្កាបាន៕
រយៈពេល៖ ៨នាទី៥៩វិនាទី
វាគ្មិន៖ បណ្ធិតយ៉ងសាំងកុមារ នាយកមជ្ឈមណ្ឌលសិក្សានិង អភិវឌ្ឍន៍កសិកម្ម កម្ពុជា
អ្នកផលិត៖ សូ លឹមសេង
No comments:
Post a Comment